Палітычны пераслед у сучаснай Беларусі адбываецца штодня. «Белсат» падсумоўвае рэпрэсіі супраць беларускага народу, пра якія сталася вядома 2 ліпеня.
– За тры «кактэйлі Молатава» ў аўтамабілі ўнутраных войскаў былому падпалкоўніку Дзмітрыю Нешту прысудзілі 12 гадоў у папраўчай калоніі ва ўмовах узмоцненага рэжыму. Яго прызналі вінаватым у незаконных дзеяннях у адносінах да паляўнічай агнястрэльнай зброі (ч. 1. арт. 295-3 КК) і акце тэрарызму (ч. 1 арт. 289 КК). Дзмітрый Нешта – вайсковы пенсіянер, працаваў у Баранавічах на 558-м авіярамонтным заводзе. Пасля прысуду яго пазбавілі звання падпалкоўніка.
– У Берасцейскім абласным судзе разгледзелі крымінальную справу ў дачыненні 23-гадовага Канстанціна Байсарава за здымку вайсковага самалёта. Канстанціна прызналі вінаватым у тым, што 27 лютага 2022 года ён даслаў у бот «экстрэмісцкага» тэлеграм-каналу відэа вайсковага самалёта. Гэтыя дзеянні кваліфікавалі паводле ч. 1 арт. 361-4 КК РБ («Спрыянне экстрэмісцкай дзейнасці»). 1 ліпеня яму вынеслі прысуд: 2 гады калоніі агульнага рэжыму. Суддзя пастанавіў узяць Байсарава пад варту ў зале суда.
– Жыхарку Полацку Ксенію Глот асудзілі на 15 содняў арышту. Яе затрымалі 30 чэрвеня. На Ксенію склалі пратакол адміністратыўнага правапарушэння паводле арт. 19.11 КаАП («Распаўсюд экстрэмісцкіх матэрыялаў»).
– Актывіста з Наваполацку Андрэя Галавырына двойчы запар пакаралі соднямі за рэпосты. Мужчыну затрымалі 15 чэрвеня і змясцілі ў Наваполацкі ЦІП, дзе ён перанёс гіпертанічны крыз. Вядома, што ў той дзень над ім адбыўся суд паводле арт. 19.11 КаАП («Распаўсюд экстрэмісцкіх матэрыялаў»). Суддзя Зінаіда Балаболава прызнала яго вінаватым і арыштавала на 15 содняў. Учора, 1 ліпеня, Андрэя зноў пакаралі 15-дзённым арыштам.
– Віктар Бабарыка выйшаў са штрафнога ізалятару, дзе правёў 10 дзён нібыта за канфлікт з сукамернікам. У траўні Бабарыка ўжо правёў 10 содняў у ШІЗА. З перапіскай у палітвязня па-ранейшаму праблемы – лістоў яму не перадаюць.
– 1,5 года «хатняй хіміі» за размаляваныя прыпынкі прысудзілі Яўгену Філіпаву паводле арт. 341 Крымінальнага кодэксу («Апаганьванне збудаванняў і псаванне маёмасці»). Згодна з абвінавачаннем, Філіпаў 5–6 жніўня 2021 года наносіў выявы балончыкам на прыпынках у Баранавіцкім раёне. Гэтым ён нанёс шкоду, якую ацанілі на 33,48 руб. Мужчына прызнаў віну і добраахвотна кампенсаваў шкоду.
– Магілёўскі абласны суд у закрытым судовым паседжанні вынес вырак у крымінальнай справе ў дачыненні жыхара Чэрыкава Віктара Карніенкі, абвінавачанага ў абразе Лукашэнкі (ч. 1 арт. 368 КК) і распальванні іншай сацыяльнай варожасці (ч. 1 арт. 130 КК). У выніку абвінавачанаму прызначылі пакаранне ў выглядзе 3 гадоў і 6 месяцаў пазбаўлення волі з адбываннем у папраўчай калоніі ва ўмовах агульнага рэжыму.
Алена Рувіна belsat.eu
#Беларусь
Comments
No comments yet. Be the first to react!