«Белсат» падводзіць вынікі апошніх содняў поўнамаштабнай вайны, якую распачала Расея ва Украіне. Пра галоўныя падзеі па стане на вечар 28 траўня чытайце ў нашым аглядзе.
Паводле аператыўных звестак Генеральнага штабу ЗСУ, з моманту поўнамаштабнага ўварвання ва Украіну страты расейскага войска дасягнулі 30 тысяч чалавек забітымі.
За апошнія содні на Данецкім і Луганскім напрамках украінскімі сіламі былі адбітыя восем атак расейцаў. Паведамляецца, што агрэсар па-ранейшаму спрабуе замацавацца ў горадзе Ліман, пры гэтым атакі на Севераданецк і ягоныя наваколлі поспехаў расейцам не прынеслі, і яны адступілі на старыя пазіцыі. Разам з тым па-за межамі Данбасу расейцы ў асноўным спрабуюць умацаваць свае цяперашнія пазіцыі, а таксама працягваюць абстрэлы ўкраінскага боку з артылерыі ды авіяцыі.
Расейскае выданне «Медуза» паведаміла, што ў Крамлі зноў абмяркоўваюць магчымы штурм Кіева – і нават спадзяюцца на поўную перамогу ў вайне. Гаворыцца, што такія змены ў планах адбыліся на фоне прасоўвання расейскіх войскаў у Данбасе цягам апошніх тыдняў.
Заходнія выданні «The New York Times» і «Wall Street Journal» са спасылкай на ўласныя крыніцы паведамілі, што ЗША гатовыя адправіць ва Украіну ракетныя сістэмы залпавага агню вялікай далёкасці. Гаворыцца, што ўзбраенне ўвойдзе ў новы пакет вайсковай дапамогі Украіне, пра якую афіцыйна могуць заявіць ужо на наступным тыдні. Імаверна, гаворка ідзе пра ракеты M31 GMLRS (Guided Multiple Launch Rocket System) і колавыя сістэмы HIMARS (High Mobility Artillery Rocket Systems), паведамляе «Wall Street Journal». Далёкасць агню гэтых сістэмаў у залежнасці ад боепрыпасу складае ад 70 да 500 кіламетраў. Паводле «The New York Times», зброя можа паступіць ва Украіну ўжо праз некалькі тыдняў.
Тым часам у Расеі Уладзімір Пуцін падпісаў закон, які скасоўвае верхнюю ўзроставую мяжу для вайсковай службы паводле кантракту. Раней падпісаць кантракт на службу маглі расейцы 19–40 гадоў і замежнікі 18–30 гадоў. Цяпер пункт пра ўзрост у законе «Аб воінскім абавязку і вайсковай службе» гучыць так: «Першы кантракт аб праходжанні вайсковай службы маюць права заключаць грамадзяне (замежныя грамадзяне) ва ўзросце з 18 гадоў».
Паводле звестак ААН, колькасць уцекачоў з Украіны на канец траўня склала 6 700 411 чалавек. Большасць з іх выехала ў Польшчу – там колькасць украінскіх уцекачоў перавысіла 3,5 мільёна чалавек, амаль мільён (984 тысяч) чалавек – у Румынію, Венгрыя прынялі больш за 665 тысяч уцекачоў, Малдова – больш за 476 тысяч, у Славаччыну з’ехалі больш за 451 тысяч украінцаў, у Беларусь – больш за 29.
Намеснік дырэктара харчовай і сельскагаспадарчай арганізацыі ААН Маўрыц’ё Марціна заявіў, што праз сітуацыю ва Украіне амаль 218 мільёнаў асобаў могуць зазнаць голад. Таксама ён падкрэсліў, што сітуацыя з пагрозай паставак збожжа трывожная для краінаў, што сталі на шлях развіцця, бо 36 з 55 дзяржаваў з харчовым крызісам купляюць больш як 10 % пшаніцы ў Расеі і Украіны.
Акупацыйная адміністрацыя Херсонскай вобласці цалкам закрыла межы. Уезд і выезд з Херсоншчыны цяпер заблакаваны. У вобласці ўводзяць спрошчаную працэдуру выдачы расейскага грамадзянства. Акрамя таго, акупацыйная адміністрацыя вобласці заявіла пра пераход на маскоўскі час, у сувязі з чым пераводу гадзіннікаў на зімовы час больш не будзе. Летні час ва Украіне супадае з маскоўскім.
Віцька Кавалак belsat.eu
#Беларусь
Comments
No comments yet. Be the first to react!